ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਸਰਗਰਮ ਰਿਹਾ ਸਿਆਸੀ ਤੇ ਸਮਾਜਿਕ ਆਗੂ ਅੰਗਦ ਸਿੰਘ ਖ਼ਾਲਸਾ

ਅੰਮ੍ਰਿਤਸਰ, 29 ਸਤੰਬਰ  – ਪੰਜਾਬ ਵਿੱਚ ਹਾਲੀਆ ਹੜ੍ਹਾਂ ਨੇ ਕਈ ਜ਼ਿਲ੍ਹਿਆਂ ਨੂੰ ਭਾਰੀ ਤਬਾਹੀ ਨਾਲ ਦੋ-ਚਾਰ ਕੀਤਾ ਹੈ। ਫ਼ਸਲਾਂ, ਘਰ, ਸਮਾਨ ਤੇ ਪਸ਼ੂ ਪਾਲਣ ਜਿਵੇਂ ਮੁੱਖ ਆਧਾਰ ਖ਼ਤਮ ਹੋਣ ਕਰਕੇ ਲੋਕ ਬੇਹੱਦ ਪਰੇਸ਼ਾਨ ਹਨ। ਇਨ੍ਹਾਂ ਗੰਭੀਰ ਹਾਲਾਤਾਂ ਵਿੱਚ ਕਈ ਸੰਗਠਨ, ਐਨਜੀਓ ਤੇ ਸਮਾਜਿਕ ਸ਼ਖਸੀਅਤਾਂ ਰਾਹਤ ਲਈ ਅੱਗੇ ਆ ਰਹੀਆਂ ਹਨ।

ਇਨ੍ਹਾਂ ਵਿਚ ਸਿਆਸੀ ਤੇ ਸਮਾਜਿਕ ਆਗੂ ਅਤੇ ਐੱਮ.ਐੱਸ.ਡਬਲਯੂ. ਦੇ ਵਿਦਿਆਰਥੀ ਸ. ਅੰਗਦ ਸਿੰਘ ਖ਼ਾਲਸਾ ਵੀ ਸ਼ਾਮਲ ਹਨ, ਜਿਨ੍ਹਾਂ ਨੇ ਡੇਰਾ ਬਾਬਾ ਨਾਨਕ, ਗੁਰਦਾਸਪੁਰ ਤੇ ਫ਼ਿਰੋਜ਼ਪੁਰ ਦੇ ਕਈ ਹੜ੍ਹ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕੀਤਾ। ਉਨ੍ਹਾਂ ਨੇ ਸਿੱਖ ਯੂਥ ਫੈਡਰੇਸ਼ਨ ਭਿੰਡਰਾਂਵਾਲਾ ਦੇ ਪ੍ਰਧਾਨ ਭਾਈ ਰਣਜੀਤ ਸਿੰਘ ਦਮਦਮੀ ਟਕਸਾਲ ਅਤੇ ਭਾਈ ਭੁਪਿੰਦਰ ਸਿੰਘ ਛੇ ਜੂਨ ਨਾਲ ਮਿਲ ਕੇ ਰਾਹਤ ਵੰਡਣ ਦੇ ਕਾਰਜਾਂ 'ਚ ਭਾਗ ਲਿਆ।

ਸ. ਅੰਗਦ ਸਿੰਘ ਨੇ ਖ਼ਾਲਸਾ ਏਡ, ਸ਼੍ਰੋਮਣੀ ਕਮੇਟੀ, ਸਿੱਖ ਏਡ ਅਸਟਰੀਆ, ਗਲੋਬਲ ਸਿੱਖ, ਅਕਾਲੀ ਦਲ ਅੰਮ੍ਰਿਤਸਰ, ਅਕਾਲੀ ਦਲ ਵਾਰਿਸ ਪੰਜਾਬ ਦੇ ਵਰਗੇ ਸੰਗਠਨਾਂ ਵੱਲੋਂ ਚੱਲ ਰਹੀਆਂ ਰਾਹਤ ਕਾਰਵਾਈਆਂ ਦੀ ਸਿਫ਼ਤ ਕੀਤੀ। ਉਨ੍ਹਾਂ ਨੇ ਖ਼ਾਸ ਕਰਕੇ ਲੋੜਵੰਦ ਲੋਕਾਂ ਤੱਕ ਪਹੁੰਚ ਰਹੀ ਸਹੀ ਤੇ ਪ੍ਰਭਾਵਸ਼ਾਲੀ ਮਦਦ ਦੀ ਸ਼ਲਾਘਾ ਕੀਤੀ।

ਅੰਗਦ ਸਿੰਘ ਖ਼ਾਲਸਾ, ਜੋ ਖ਼ੁਦ ਕਸ਼ਮੀਰ ਤੋਂ ਹਨ, ਨੇ ਕਈ ਦਿਨ ਤੱਕ ਮੈਦਾਨੀ ਪੱਧਰ 'ਤੇ ਮੈਡੀਕਲ ਕੈਂਪ, ਰਾਸ਼ਨ, ਕੱਪੜੇ, ਨਗਦ ਰਕਮ ਅਤੇ ਡੰਗਰਾਂ ਲਈ ਚਾਰਾ ਪਹੁੰਚਾਇਆ। ਉਨ੍ਹਾਂ ਨੇ ਪਿੰਡ ਧਰਮਕੋਟ ਰੰਧਾਵਾ ਵਿਖੇ ਅਕਾਲੀ ਦਲ ਵਾਰਿਸ ਪੰਜਾਬ ਦੇ ਵੱਲੋਂ ਚਲਾਏ ਜਾ ਰਹੇ ਰਾਹਤ ਕੈਂਪ ਵਿੱਚ ਵੀ ਸ਼ਿਰਕਤ ਕੀਤੀ, ਜਿੱਥੇ ਵਲੰਟੀਅਰਾਂ ਨੇ ਹੜ੍ਹ ਪ੍ਰਭਾਵਿਤ ਲੋਕਾਂ ਦੀਆਂ ਜ਼ਰੂਰਤਾਂ ਬਾਰੇ ਡਾਟਾ ਇਕੱਠਾ ਕੀਤਾ।

ਤਸਦੀਕ ਤੋਂ ਬਾਅਦ, ਜ਼ਰੂਰੀ ਵਸਤਾਂ ਜਿਵੇਂ ਭੋਜਨ ਕਿੱਟਾਂ, ਪਸ਼ੂ ਚਾਰਾ ਆਦਿ ਨਾਲ ਲੈਸ ਟੀਮ ਤੁਰੰਤ ਪਹੁੰਚਾਈ ਜਾਂਦੀ ਸੀ। ਇਹ ਕੈਂਪ ਇਲਾਕੇ ਵਿੱਚ ਕਾਫ਼ੀ ਪ੍ਰਭਾਵਸ਼ਾਲੀ ਢੰਗ ਨਾਲ ਕੰਮ ਕਰ ਰਿਹਾ ਸੀ। ਸਿੰਘ ਸਾਹਿਬ ਭਾਈ ਜਸਬੀਰ ਸਿੰਘ ਰੋਡੇ ਵੱਲੋਂ ਵੀ ਇੱਕ ਵੱਖਰਾ ਰਾਹਤ ਕੈਂਪ ਚਲਾਇਆ ਜਾ ਰਿਹਾ ਸੀ।

ਸ. ਅੰਗਦ ਸਿੰਘ ਨੇ ਪੰਜਾਬ ਤੇ ਹੋਰ ਸੂਬਿਆਂ ਦੇ ਲੋਕਾਂ ਦੀ ਭਾਵਨਾਤਮਕ ਇਕਜੁੱਟਤਾ ਦੀ ਵੀ ਪ੍ਰਸ਼ੰਸਾ ਕੀਤੀ। ਉਨ੍ਹਾਂ ਕਿਹਾ ਕਿ ਹੜ੍ਹ ਪ੍ਰਭਾਵਿਤ ਲੋਕਾਂ ਲਈ ਸਭ ਤੋਂ ਵੱਡੀ ਲੋੜ ਪਸ਼ੂ ਚਾਰੇ ਦੀ ਸੀ ਕਿਉਂਕਿ ਪੰਜਾਬ ਦੇ ਪਿੰਡਾਂ ਵਿੱਚ ਲਗਭਗ ਹਰ ਘਰ ਵਿੱਚ ਪਸ਼ੂ ਹਨ। ਉਨ੍ਹਾਂ ਨੇ ਇਹ ਵੀ ਜ਼ਿਕਰ ਕੀਤਾ ਕਿ ਭਾਰਤ ਦੇ ਵੱਖ-ਵੱਖ ਸੂਬਿਆਂ ਤੋਂ ਮੁਸਲਿਮ ਭਾਈਚਾਰੇ ਨੇ ਵੀ ਰਾਹਤ ਸਮੱਗਰੀ ਭੇਜ ਕੇ ਇਨਸਾਨੀਅਤ ਦੀ ਉਦਾਹਰਣ ਦਿੱਤੀ ਹੈ।